استشارة قانونيه عاجلة جدا ارجو الرد

السلام عليكم

احنا اسرة مكونة من اب وام وبنتين وولد كنا عايشين مع بعض فى شقة ايجار قديم بالقاهرة باسم والدى اختى الكبيرة تزوجت فى حياة والدى ووالدتى فى مسكن خاص لها ثم توفى والدى وطلع الوصل باسم ورثة المرحوم والدى وفضلت انا واختى ووالدتى فى الشقة تزوجت اختى الثانيه فى مسكن خاص لها ايضا فضلت انا ووالدتى الى ان توفيت والدتى وفضلت انا لوحدى فى الشقة ومازال الايصال بيطلع باسم ورثة المرحوم والدى ... عرض على صاحب العمارة شراء الشقة تمليك فاشتريتها باسمى عشان اتزوج فيها باذن الله من مالى الخاص عاوز حاليا اجرها لظروف خاصة بى اخواتى عاوزين يطعنوا فى العقد ويفسخوا العقد بحجة ان صاحب العمارة باع لى الشقة من وراهم ولم ياخذ منهم تنازل عن حقهم فى الشقة او بيدعوا انى رضيت صاحب العمارة بمبلغ عشان يرضى يكتب العقد ويتغاضى عن حق اخواتى فى الشقة وطبعا هذا لم يحدث اطلاقا والله شاهد على ما اقول وان اختى الثانيه اللى تزوجت فى حياة والدتى عاوزه تدعى انها كانت مسافرة ورجعت بحجة ان عنوان بطاقتها على نفس عنوان الشقة حاليا بتاعت والدنا لانها لم تقوم بتغير العنوان الى محل ساكنها المتزوجة فيه حاليا ولم تطلع بطاقة عائلية منذ ان تزوجت مع العلم ان وثيقة الزواج بتاعتها مكتوب فيها عنوان المسكن اللى هى عايشه فيه حاليا وكذلك شهادات ميلاد اولادها ومدارسهم فهل يجوز الطعن فى هذه الحالة وفسخ العقد ..علما ان تاريخ وفاة ابى مارس 2005 وامى مايو 2009 ...

ثانى حاجة عاوزين حقهم الشرعى فى الشقة بمعنى لو انا بعتها ياخذوا هما النصف وانا النصف وكذلك بالنسبه للايجار لو اجرتها ياخذوا هما النصف وانا النصف فايه راى حضرتكم فى الكلام ده من الناحية الشرعيةهل ليهم حق شرعى فيها بعد ما امتلكتها ... نسيت اذكر حاجة ان العقد اللى معايه حاليا لم يذكر فيه ان الشقة كانت ايجار قديم فهل هناك ضرر من عدم ذكر ذلك مع العلم انى عملت صحة توقيع فقط على العقد ...

فى انتظار ردك سيادة المستشار احمد جزاءاك الله كل خير ..

عقد الايجار امتد مرة واحدة لك كونك انت المقيم معهم حتى الوفاة وقبل الوفاة بفترةفيكون لك وحدك الحق فى التنازل عن الشقة لصاحب الشقة والتنازل عن عقد الابجار ولا يوجد مانع من تحرير عقد بيع بالشقة لك
ولا يستطيع اى شخص ان يشاركك فى الشقة او في ايجارها لانها مملوكة لك وحدك وليس من حقم مشاركتك فيها

شكرا سيادة المستشار احمد جزاءاك الله كل خير ..

معلش لى سؤال اخر فى عقد التمليك لم يذكر ان الشقة كانت ايجار قديم وليها امتداد قانونى هل هناك ضرر من ذلك بالاضافة انى لم اكتب تنازل رسمى عن عقد الايجار فهل بمجرد تملكى للشقة ابقى اتنازلت عن عقد الايجار مباشرة ولا المفروض كان يكتب رسمى هذا التنازل ...

عدم كتابة التنازل او الامتداد لا يعيب عقد التمليك وانت كونك مالك لا يستطيع اى شخص ان يتعرض لملكيتك للشقة او يطعن على العقد باى طعن كونهم من الغير وليس لهم اى مصلحة فى العقد

الف شكر سيادة المستشار احمد على ردك الكريم جزاءاك الله كل خير والحمد لله ارحت قلبى ...

لى استفسار اخر عندى العمارة غير مسجلة شهر عقارى لكن الارض المبنيه عليها العمارة نفسها مسجلة فهل ينفع عمل صحة ونفاذ فى هذا الوضع وتتكلف فى حدود كام علما بان مساحة الشقة 105 متر مربع ..

يجوز رفع دعوى الصحة والنفاذ ومن الممكن السؤال عنها فى الشهر العقاري التابع له الشقة

هى تبع الشهر العقارى اللى فى الدقى بس انا كنت عاوز اعرف من حضرتك لو حاجة زى كدا اتعاب المحامى او حضرتك شخصيا تكون فى حدود كام بمصاريفها بكل حاجة لانى بصراحة سالت واحد محامى وقالى انها هتدخل فى 6000 جنيه بكل حاجة وحاسس ان المبلغ ده مبالغ فيه جداا فايه راى حضرتك ..

لا يجوز تحديد الرسوم او المصاريف او الاتعاب الا بعد الاطلاع على المستندات

طيب معلش يا استاذ احمد فى حاجة محيرانى قراءة فى احد المواضيع ان زواج الابنه التى امتد اليها عقد الايجار لايعد تركا للمسكن وانا عندى اختى الوسطانيه تزوجت بعد وفاة والدنا وفى حياة والدتنا فى مسكن خاص بها مع زوجها وبقالها حوالى 5 سنين متزوجه وطبيعى قبل ما تتزوج كانت مقيمه مع والدها ومعانا فى الشقة فما مدى صحة هذا الكلام واسف لازعاج حضرتك مره اخرى ..

زواجها بعد الامتداد لا يعد تركا للمسكن وليس قبل الامتداد فلابد ان يكون قد امتد لها العقد قبل الزواج ولكن بصفة عامة وضعك مختلف عنم اى شخص كونك الان مالك وليس مستأجر

طيب افرض اطلقت لقدر الله من زوجها هل يكون ليها حق الامتداد القانونى فى الشقة ..

انت الان مالك وانتهت قصة الايجار بمجرد تحرير عقد البيع